काठमाण्डौं

नारायणहिटी दरबार सङ्ग्रहालय तथा गणतन्त्र स्मारक व्यवस्थापन तथा सञ्चालन समितिका कार्यकारी निर्देशक भेषनारायण दाहालले दिनु भएको राजीनामा स्वीकृत भएको छ ।  उहाँले मंगलबार संस्कृति, पर्यटन तथा नागरिक उड्डयन मन्त्रालयमा राजीनामा बुझाउनु भएको हो ।

उहाँको राजीनामा स्वीकृत भएको मन्त्रालयका सचिव महेश्वर न्यौपानेले जानकारी दिनुभयो । उहाँले भन्नुभयो, ‘कार्यकारी निर्देशक दाहालले राजीनामा दिनुभएको थियो, उहाँको राजीनामा स्वीकृत भएको छ ।’

दाहाल नारायणहिटी दरबार संग्रहालय परिसरको जग्गा बतास समूहलाई रेष्टुरेन्ट सञ्चालनका लागि ठेक्का दिएको प्रकरणमा विवादमा मुछिएका थिए । छानबिन समितिले मिलेमतोमा सम्झौता भएको प्रतिवेदन बुझाएसँगै दाहालले राजीनामा बुझाउनु भएको थियो ।

जग्गा भाडा दिएको विषय विवादित बनेपछि मन्त्री आलेको निर्देशनमा छानबिन समिति बनेको थियो । समितिले पुस २६ गते मन्त्री आलेलाई प्रतिवेदन बुझाएको थियो ।

रासस