काठमाडौं । आदर्श लघुवित्त वित्तिय संस्था लिमिटेडले  सर्वसाधारणका लागि निष्कासन गरेको साधारण सेयर (आईपीओ) बाँडफाँड सम्पन्न भएको छ । आईपीओ बाँडफाँड निष्कासन तथा बिक्री प्रबन्धक बिओके क्यापिटल लिमिटेडको कार्यालय, नक्साल, काठमाडौँमा सम्मपन्न भएको हो ।

कम्पनीले प्रतिकित्ता १०० रूपैयाँ अंकित दरमा ६७ लाख रूपैयाँ बराबरको ६७ हजार कित्ता आईपीओ निष्कासन गरेको थियो । जसमध्ये जारी पूँजीको ०.५ प्रतिशत अर्थात १ हजार ३५ कित्ता सेयर कर्मचारीहरुका लागि, ५ प्रतिशत अर्थात ३ हजार ३५० कित्ता सेयर सामूहिक लगानी कोषका लागि र ६२ हजार ६१५  कित्ता साधारण सेयर सर्वसाधारणका लागि छुट्याइएको थियो ।

अन्तिम दिनसम्म १८ लाख ७ हजार १ सय २४ जना  लगानीकर्ताहरूले २ करोड २ लाख ५० हजार ९ सय ८० कित्ताका लागि आवेदन दिएका छन् । यो सर्वसाधारणका लागि छुट्याइएको भन्दा ३२३. ४२ गुणा बढी हो । यो आईपीओमा १६ लाख ७२ हजार ७९४ आवेदकबाट परेको १ करोड ८४ लाख २ हजार ४६० कित्ता सदर भएको छ। १ हजार ८५८ आवेदकबाट परेको २२ हजार ४४० कित्ता बदर भएको छ।

मागभन्दा धेरै आवेदन परेको हुनाले कम्पनीको आईपीओ गोलाप्रथाद्वारा बाँडफाँड गरिएको थियो । गोलाप्रथाबाट भाग्य ६ हजार २६१ जनाले १० कित्ताका दरले सेयर पाएका छन्। तिनै भाग्यमानीमध्ये २० कित्ताभन्दा बढी आवेदन दिने ५ जनाले थप १–१ कित्ता सेयर पाएका छन्। भने १६ लाख ६६ हजार ५३३ जना आवेदकको हात खाली भएको छ।

आईपीओको अन्तिम नतिजा धितोपत्र बिक्री प्रबन्धक बीओके क्यापिटल र धितोपत्र निष्कासनकर्ता आदर्श लघुवित्तको वेबसाइटका साथै सीडीएससीको https://iporesult.cdsc.com.np/ मा हेर्न सकिनेछ।