काठमाडौं । विन्ध्यवासिनी हाइड्रोपावरको आईपीओमा अन्तिम दिनसम्म १६.०९७ गुणा बढी आवेदन परेको छ । सीडीएसका अनुसार अन्तिम दिनसम्म कम्पनीको आईपीओमा १८ लाख ४८ हजार ७०१ जना आवेदकबाट २ करोड १९ लाख ७२ हजार ५२० कित्ता सेयरका लागि २ अर्ब १९ करोड ७२ लाख ५२ हजार रुपैयाँ बराबरको आवेदन परेको छ ।
 
कम्पनीले जेठ २० गतेदेखि २५ गतेसम्म १ अर्ब ५० करोड रुपैयाँ बराबरको प्रतिकित्ता १ सय रुपैयाँ अंकित मूल्यका १५ लाख कित्ता साधारण सेयर निष्काशन तथा बिक्री खुला गरेको थियो । जसमध्ये ४ प्रतिशत अर्थात ६० हजार कित्ता शेयर कर्मचारीहरुका लागि, ५ प्रतिशत अर्थात ७५ हजार कित्ता सेयर सामूहिक लगानी कोषका लागि र बाँकी १३ लाख ६५ हजार कित्ता सेयर सर्वसाधारणको लागि छुट्याईएको छ ।

कम्पनीको आईपीओमा मागभन्दा बढी आवेदन परेको हुनाले गोलाप्रथाबाट आईपीओ बाँडफाँड हुने छ । मागभन्दा धेरै बढी आवेदन परेको हुँदा १० कित्ता आइपीओ हात पार्न भाग्यकै भरपर्नु पर्ने छ । गोलाप्रथाबाट आईपीओ बाँडफाँड गर्दा १ लाख ३६ हजार ५०० जनाले मात्र १० कित्ता सेयर हात पार्नेछन् । बाँकी १७ लाख १२ हजार २०१ जनाको भने हात खाली हुनेछ ।