काठमाण्डौं । सेयर लगानीकर्ताले नाफाबाट सरकारलाई ११ अर्ब ३ करोड २६ लाख रुपैयाँ पुँजीगत लाभकर तिरेका छन् । नेपाल धितोपत्र बोर्डका अनुसार चालु आर्थिक वर्षमा लगानीकर्ताहरुले सरकारलाई जेठ १७ गतेसम्म सो रकम बुझाएका हुन्।

अघिल्लो आर्थिक वर्षमा लगानीकर्ताहरुले सरकारलाई पुँजीगत लाभकर १५ अर्ब ५३ करोड रुपैयाँ बुझाएका थिए । सरकारले दोस्रो बजारको सेयर कारोबारमा सेयर किनेको एक वर्षभित्रमा बेचेमा साढे ७ प्रतिशत तथा एक वर्षभन्दा बढी समय राखेर बेचेमा ५ प्रतिशत लाभकर लिने गरेको छ ।

अघिल्लो आर्थिक वर्षदेखि पुँजीगत लाभकर ह्वातै बढेको हो । सरकारले आर्थिक वर्ष २०७६÷७७ मा ९८ करोड रुपैयाँ पुँजीगत लाभकरबाट सरकारले उठाएको थियो । २०७५÷७६ मा ६४ करोड रुपैयाँमात्र लाभकर सरकारले पाएको थियो । २०७४/७५ मा ४७ करोड रुपैयाँ लाभकरबाट पाएको थियो ।