काठमाण्डौं, पुस १६
आर्थिक अभावका कारण उपचारबाट वञ्चित हुन नदिन सरकारले लागू गरेको स्वास्थ्य बीमा कार्यक्रम काभ्रेपलाञ्चोकमा प्रभावकारी बन्दै गएको छ । यस कार्यक्रमअन्र्तगत जिल्लामा हालसम्म करिब ३० प्रतिशत नागरिकले बीमा गराएको छन् । जिल्लास्थित स्वास्थ्य बीमा बोर्डका अनुसार २९.८० प्रतिशत अर्थात् १ लाख ५ हजार ८२ जनाले स्वास्थ्य बीमा कार्यक्रममा सहभागिता जनाएको  छ ।

स्वास्थ्य बीमा बोर्डको जिल्ला प्रमुख मुना निरौलाका अनुसार काभ्रेपलाञ्चोकमा स्वास्थ्य बीमा कार्यक्रमप्रति आकर्षण बढ्दै गएको पाइएको छ । उनले ९ हजार ५ सय ३५ परिवारले बीमा नवीकरण गरिरहेका बताउनु भयो । बीमा नवीकरण गराउनेको सङ्ख्या दैनिक बढिरहेको छ  । 

बोर्डका अनुसार हालसम्म बनेपा नगरपालिकामा २३ हजार ३ सय ११, धुलिखेल नगरपालिकामा २२ हजार ६ सय ८९, पनौती नगरपालिकामा १७ हजार १ सय १४, पाँचखाल नगरका १२ हजार ९ सय ६, मण्डनदेउपुर नगरपालिकामा  १० हजार २ सय ४९, नमोबुद्ध नगरपालिकामा ५ हजार ९ सय ८६ ले स्वास्थ्य बीमा गराएको जनाइएको छ । भुम्लु गाउँपालिकामा ३ हजार ६ सय १०, रोशीमा  २ हजार ४ सय ५७, बेथानचोकमा २ हजार ८७, चौँरीदेउरालीमा १  हजार ६ सय २८, तेमालमा १ हजार ३ सय ५२, महाभारतमा १  हजार ७० र खानीखोला गाउँपालिकामा ६ सय २४ ले स्वास्थ्य बीमा गरेको बोर्डले जनाएको छ । 
बोर्डको तथ्याङ्कअनुसार सबैभन्दा बढी जिल्ला सदरमुकाम धुलिखेलका ७०.५४ प्रतिशत नागरिकले स्वास्थ्य बीमा गरेका छन् भने सबैभन्दा कम बीमा गराउनेमा खानीखोला गाउँपालिकाको ४.३३ प्रतिशत रहेका छन् । बीमितमध्ये ६  हजार २ सय ८८ ज्येष्ठ नागरिक हुनुहुन्छ । ४ सय ३५ स्वास्थ्य स्वयंसेविका, ५३ एचआइभी सङ्क्रमित परिवार, २४ कुष्ठरोगी परिवार, ४ सय ९ पूर्ण अपाङ्गता भएका परिवार रहेको बोर्डले जनाएको छ । जिल्लामा बीमाबापत ११  करोड ३५ लाख ४३ हजार ४०० सङ्कलन भएको छ । 
सरकारले महिला स्वास्थ्य स्वयंसेविकालाई ५० प्रतिशत छुट तथा पूर्ण अपाङ्गता भएका परिवार र एचआइभी सङ्क्रमितको परिवारलाई भने निःशुल्क बीमा गर्ने प्रावधान  गरेको छ ।