काठमाण्डौं, पुस १५
स्याङ्जाको वालिङ नगरपालिकाले किसानलाई हाते ट्र्याक्टर मर्मतसम्बन्धी तालिम प्रदान गरेको छ । नगरपालिकाले हरेक वर्ष हाते ट्र्याक्टर वितरण गर्दै आए पनि बिग्रेपछि प्रयोगबिहीन हुने समस्या बढ्दै गएकाले किसानलाई मर्मतको तालिम दिइएको हो ।

मर्मत गर्न सिकाएर हाते ट्र्याक्टर सञ्चालन गर्न सकियोस् भन्ने उद्देश्यका साथ किसानलाई तालिम प्रदान गरिएको नगर प्रमुख दिलीपप्रताप खाँणले बताउनुभयो ।

वालिङ नगरपालिका र युएनडिपी नेपालको साझेदारीमा किसानलाई हाते ट्रयाक्टर मर्मतसम्बन्धी एकहप्ते तालिम दिइएको हो । तालिममा वालिङका १४ वडाका ५० कृषक सहभागी  भएका छन् । 

गाउँ गाउँमा हाते ट्रयाक्टर छन्, कतिपय बिग्रेपछि थन्क्याइएको छ र नयाँ किन्ने गरेको पाइयो ।  त्यसैले किसानलाई तालिम दिएर  मर्मत गरी पुनः सञ्चालन गर्न सक्ने बनाउने योजना अन्तर्गत तालिम दिएको खाँडले बताउनु भयो । 

मर्मतभन्दा ढुवानीमा बढी रकम र समय खर्च हुने गरेको छ ।  मर्मतमा धेरै खर्च हुने भएकाले त्यसलाई जोगाउन पनि किसानलाई सीप सिकाइएको युएनडिपी नेपालका गण्डकी तथा लुम्बिनी प्रदेश प्रमुख सुदीप अर्यालले बताउनुभयो ।