काठमाण्डौं, पुस १४

साल्टट्रेडि कर्पोरिशन लिमिटेड जनकपुर प्रदेश कार्यालयले चालू आर्थिक वर्षको  पाँच महिनामा कूल १४ करोड मूल्य बराबरको नूनजन्य सामग्री बिक्री गरेको छ ।

कार्यालयले आव २०७८÷७९ साउनदेखि मङ्सिर मसान्तसम्मका अवधिमा कूल १४ करोड ३५ लाख २५ हजार ३ सय २५ रुपैयाँ बराबरको नूनजन्य सामग्री बिक्री गरेको थियो ।  कार्यालय प्रमुख अमोज लामिछानेले गत आर्थिक वर्ष २०७७÷७८ मा  २७ करोड १० लाख ५५ हजार ८ सय ५० रुपैयाँ बराबरको नूनजन्य सामग्री बिक्री गरेको जानकारी दिनुभयो ।

२०२० साल भदौ २७ गते  सार्वजानिक निजी साझेदारीमा स्थापित सो कर्पोरेशनले पछिल्लो समयमा ऐतिहासिक फड्को मारेको छ । संस्थामा सरकारको २२ प्रतिशत शेयर लगानी छ । 

स्थापनाका ५८ वर्षमा कर्पोरेशनले दैनिक उपभोग्य बस्तु नून, चिनी, चामल, दालअन्य गेडागुडी, खाने तेल, आँटा, मैदा, ग्यास लगायतका वस्तु सर्वसुलभ रुपमा बिक्री वितरण गर्दै आएको छ ।

कर्पोरेशनले आफ्नो लगानीमा गोरखकाली रबर उद्योग , खाद्य उद्योग , नेपाल वनस्पति ध्यू उद्योग लिमिटेड लगायत हिमालय खाद्य एवं प्याकिङ उद्योग स्थापना गरेको थियो । यसले नेशनल फाइनान्स लि ,सगरमाथा इन्स्योरेन्स जस्ता संस्थाको स्थापना गरेर देशलाई औद्योगिकरणको दिशामा अघि बढाएको छ । सरकारले दिएको नीति निर्देशनमा कर्पोरेशनले समयमै आयात व्यवस्था गरेर चिनी, नून, चामल र मलको कमी हुन दिएको छैन । 

कर्पोरेशनले बिक्रीवितरण गर्दै आएको आयोडिनयुक्त नून दक्षिण एशियामै सस्तो छ यसले ७ वर्षअघिकै मूल्यमा नूनको सहजरुपमा  बिक्रीवितरण गर्दै आइरहेको छ ।