काठमाण्डौं । सेयर लगानीकर्ताहरुले लामो समयदेखि ब्रोकर कम्पनी बढाउनुपर्ने तथा बैंकलाई ब्रोकर दिनुपर्ने माग गर्दै आएका छन् । 

नेपाल स्टक एक्सचेन्जका प्रमुख कार्यकारी अधिकृत (सिईओ) कृष्णबहादुर कार्कीले ब्रोकर कम्पनी थप गर्नुपर्ने विषयबारे अध्ययन भइरहेको बताउनुभएको छ । 

नेपाल उद्योग वाणिज्य महासंघले गरेको ‘परिपक्व पुँजीबजार सम्मेलन’मा बोल्दै उहाँले ब्रोकर कम्पनी थप हुनुपर्ने विषय उठिरहेको र यस बारे अध्ययन भइरहेको बताउनुभएको हो। 

उहाँका अनुसार चाडै ब्रोकर कम्पनीको संख्यामा पुनरावलोकन हुन्छ ।

यस्तै उहाँले सेयर बजारमा सर्वसाधारदेखि युवा पुस्ताको सभागिता तथा चासो रहेकाले यो पूँजी बजारका लागि राम्रो भएको बताउनुभयो । 

नेप्से पूँजी बजार विस्तार र विकासका लागि सधै सकरात्मक रहेको उहाँले बताउनुभयो । साथै उहाँले पूँजी बजार विकासका लागि नीतिगत सुधार गर्न नेप्से तयार रहेको पनि बताउनुभयो ।

यसैयरी सोही कार्यक्रममा बोल्दै नेपाल धितोपत्र बोर्ड (सेबोन)का अध्यक्ष रमेशकुमार हमालले पूँजी बजारमा थुप्रै चुनौतीहरु रहकाले बजार विकास र सन्तुलनका लागि धेरै काम गर्न बाँकी रहेको बताउनुभयो । 

अहिले  बजारमा संस्थागत लगानीकर्ताको कमी रहेको र यसमा लगानीकर्ता ल्याउन वातावरण बनाउनुपर्ने उहाँले बताउनुभयो । 

पुँजीबजारसम्बन्धी साक्षारताको कमीका कारण साना र सोझा लगानीकर्ताहरु फस्नुका साथै बजारमा तीव्र उतारचढाव भइरहेको उहाँको भनाइ छ। 

उहाँले भन्नुभयो, ‘सामाजिक सञ्जालहरुमा बजारसम्बन्धी भ्रमहरु फैलाउने कामलाई नियन्त्रण गर्न आवश्यक छ । यसका लागि ऐन परिमार्जन गर्न आवश्यक छ ।’

उहाँले घट्दो विदेशी मुद्रा सञ्चितीमा सुधार ल्याउन विदेशमा रहेका नेपालीलाई आइपीओ आरक्षण दिने तयारी भइरहेको भइरहेको बताउनुभयो ।