काठमाण्डौं । रिभर फल्स पावर लिमिटेडले सर्वसाधारणका लागि आइपीओ बिक्रि गर्ने भएको छ । कम्पनीले वैशाख २८ गतेदेखि दोस्रो चरणमा सर्वसाधारणका लागि आइपीओ  बिक्रि गर्ने भएको हो । 

कम्पनीको कर्मचारी सहित सर्बसाधारणमा प्रतिकित्ता १०० अंकित दरको २७ लाख ३० हजार कित्ता सेयर बिक्री गर्ने तयारी गरेको कमपनीले जानकारी दिएको छ । 

कुल कित्तामध्ये २ प्रतिशत अर्थात ५४ हजार ६०० कित्ता कर्मचारीहरुका लागि सुरक्षित गरिएको छ भने ५ प्रतिशत अर्थात १ लाख ३६ हजार ५०० कित्ता सामूहिक लगानीकोषमा बाँडफाँट गरिसकिएको कम्पनीको भनाई छ ।

यी बाहेक बाँकी २५ लाख ३८ हजार ९०० कित्ता सेयर भने सार्वजनिक निष्कासनमा आउन लागेको हो ।

सर्वसाधारणले यो आइपीओ खरीदका लागि छिटोमा जेठ ४ गतेसम्म आवेदन दिन सक्नेछन् भने सो अवधिसम्म माग बमोजिम आवेदन नपरेमा भने ढिलो अवधि जेठ ११ गतेसम्म बिक्री खुला हुने कम्पनीले जनाएको छ । 

तर पछिल्लो समय आइपीओमा परेको आवेदनको प्रवृति हेर्दा यो आइपीओ छिटा अवधिभित्रै बिक्री हुने सम्भावना देखिन्छ ।

खरीद कर्ताहरुले यो आइपीओका लागि न्यूनतम १० कित्तादेखि अधिकतम १ लाख कित्तासम्म माग गर्न सक्नेछ व्यवस्था छ । यो आईपीओ विक्री प्रबन्धकमा प्रभु क्यापिटल लिमिटेड रहेको छ ।

बिक्री प्रबन्धकसँगै सम्पूर्ण आस्बा सेवा सदस्य बैंक तथा वित्तीय संस्था र तिनका शाखा कार्यालयबाट यो आईपीओ खरीदका लागि आवेदन दिन सकिनेछ।

साथै मेरो शेयर सफ्टवेयर र मेरो शेयर एपको माध्यमबाट पनि आवेदन दिन सकिने व्यवस्था छ ।

हाल संस्थापक तर्फ ५१ प्रतिशत बराबरको ३५ करोड ७० लाख चुक्तापूँजी कायम रहेको कम्पनीको सर्वसाधारणमा आइपीओ जारी पश्चात यो पूँजी ७० करोड रुपैयाँ पुग्नेछ ।

कम्पनीले स्थानीयमा १० प्रतिशत सेयर बिक्री गरेको हो भने कर्मचारी सहित सर्वसाधारणमा ३९ प्रतिशत सेयर बिक्री गर्न लागेको हो।