काठमाण्डौं
साताको चौथो दिन बुुधबार सेयर बजारमा गिरावट देखिएको छ । सोमबार र मंगलबार लगातार रुपमा दोहोरो अंकले बढेको नेप्से बुधबार दोहोरो अंकले नै घटेको छ । 

नेपाल स्टक एक्सचेञ्जका अनुसार बुधबार सेयर कारोबार मापक नेप्से परिसूचक १५.५० अंकले घटेर २७२०.४३ विन्दुमा झरेको छ । आज नेप्से ०.५७ प्रतिशतले घटेको हो । यसैगरी सेन्सेटिभ परिसूचक पनि ५.२२ अंकले घटेर ५१७.९३ विन्दुमा झरेको छ । 

कूल २ सय २८ वटा कम्पनीको ६२ लाख ४७ हजार ७ सय ७४ कित्ता सेयर खरिदबिक्री हुँदा ३ अर्ब १३ करोड १२ लाख १० हजार २ सय ८२ रूपैयाँ बराबरको कारोबार भएको नेप्सेले जनाएको छ ।

स्टकका अनुसार कारोबार भएका कूल १३ उपसमूहमध्ये आज म्यूचूअल फण्ड र हाइड्रोपावर उपसमूहबाहेक बाँकी सबै उपसमूहको सेयर घटेको छ ।

यसै दिन पनि नेपाल टेलिकमको नै सर्वाधिक कारोबार भएको छ । टेलिकमको १९ करोड ३७ लाख ८५ हजार रूपैयाँ बराबरको कारोबार भएको हो ।

बुधबार युनाइटेड ईदी मार्दी हाइड्रोपावर र दिव्यश्वरी हाइड्रोपावरको सेयरमूल्यमा सकारात्मक सर्किट लागेको छ । युनाइटेड ईदी मार्दीको सेयरमूल्य १० प्रतिशतले बढेर १ हजार १० रुपैयाँ १० पैसा र दिव्यश्वरी हाइड्रोपावरको सेयरमूल्य १० प्रतिशतले बढेर ३ सय ५९ रूपैयाँ ७० पैसा पुगेको छ ।

बुधवार प्रभु बैंक डिबेञ्चर २०८४ को मूल्य सबैभन्दा धेरै घटेको छ । उक्त डिबेञ्चरको मूल्य ३.९६ प्रतिशतले घटेर ९ सय ५० रूपैयाँ ८० पैसामा झरेको छ ।