काठमाडौं
राष्ट्रिय बीमा कम्पनीले चालु आर्थिक वर्षको दोस्रो त्रैमाससम्मको वित्तीय विवरण सार्वजनिक गरेको छ । कम्पनीले सार्वजनिक गरेको वित्तीय विवरण अनुसार राष्ट्रिय बीमा कम्पनीले चालु आर्थिक वर्षको दोस्रो त्रैमाससम्ममा १९ करोड ४३ लाख रुपैयाँ खुद नाफा आर्जन गरेको छ । यो गत आर्थिक वर्षको यहि अवधिको४१ दशमलव ४२ प्रतिशतले बढी हो ।

समीक्षा अवधिमा कम्पनीको खुद बीमा शुल्क ०दशमलव ०९ प्रतिशतले बढेर १२ करोड ८८ लाख रुपयाँ पुगेको छ ।  गत आर्थिक वर्षको दोस्रो त्रैमासमा कम्पनीले १२ करोड ८७ लाख रुपैयाँ खुद बीमा शुल्क कमाएको थियो । यस आर्थिक वर्षमा कम्पनीले कुल ५९ करोड ३५ लाख रुपैयाँ बीमा शुल्क कमाएको छ ।

सोही अवधिमा राष्ट्रिय बीमा कम्पनीले १४ हजार ८५९ वटा बीमालेख जारी गरेको छ ।  कम्पनीले चालु आर्थिक वर्षको दोस्रो त्रैमाससम्म ११९६ वटा बीमालेखका लागि २३ करोड ६ लाख रुपैयाँ कुल दाबी भुक्तानी गरेको छ।

कम्पनीको चुक्ता पूँजी २६ करोड ६६ लाख रुपैयाँ रहेको छ भने जगेडा कोषमा ३ अर्ब २४ करोड ५६ लाख रुपैयाँ रहेको छ । बीमा कोषमा २ अर्ब ५२ करोड ७३ लाख रुपैयाँ जम्मा रहेको छ । त्यस्तै, कम्पनीको प्रतिशेयर आम्दानी १४५ दशमलव ७५ रुपैयाँ  रहेको छ भने, प्रतिशेयर नेटवर्थ १३१७ दशमलव २५ रुपैयाँ रहेको छ ।