काठमाण्डौं
नेपाल राष्ट्र बैंकका गभर्नर महाप्रसाद अधिकारीले छोटो समयमा उठाइने आन्तरिक ऋणका कारण बैंकिङ प्रणालीमा थप तरलता समस्या हुने बताउनु भएको छ । सरकारले २ खर्ब ५० अर्ब आन्तरिक ऋण उठाउने लक्ष्य तरलता समस्याको समाधान नभएको उहाँले बताउनु भयो ।

आइतबार संसदको लेखासमितिमा उहाँले आन्तरिक ऋण उठाउने समय भएको तर त्यसले तरलतामा समस्या निम्तिने  बताउनु भएको हो । गभर्नर अधिकारीका अनुसार चालु वर्षमा ६ अर्ब रुपैयाँ आन्तरिक ऋण उठिसकेको छ।
सरकारले २ खर्ब ५० अर्ब रुपैयाँ उठाउने लक्ष्य लिएकोमा यदि बाँकी सबै ऋण उठाउने हो भने भैरहेको तरलता समस्यामा झनै समस्या थपिने उहाँले बताउनु भयो । सरकारले अब २ खर्ब ४४ अर्ब सार्वजनिक ऋण उठाउन बाँकी छ । यो सबै ऋण उठाउन लाग्ने हो भने तरलतामा दवाव बढ्न गई आर्थिक कारोबार प्रभावित बन्नपुग्ने उहाँको तर्क छ । 
सरकारले चालुवर्षमा राखेको आर्थिक बृद्धिदरको लक्ष्य हाँसिल गर्न चुनौतीपूर्ण अवस्था रहेको बताउँदै चालु वर्षमा मूल्यबृद्धि  हुने खतरा पनि त्यतिकै बढेको बताउनु भयो । सरकारले चालु वर्षको आर्थिक बृद्धिदरको लक्ष्य ६.५० प्रतिशत राखिएको छ ।