पुस २३, काठमाण्डौं

पाटन  उच्च अदालतबाट २६ लाख जरिवाना भएपछि फरार रहेका काठमाण्डौं निवासी ४१ वर्षीय राजेन्द्र कुमार श्रेष्ठलाई  प्रहरीले पक्राउ गरेको छ । उनलाई प्रहरीको केन्द्रीय अनुसन्धान ब्युरो (सिआइबी)ले शुक्रबार बानेश्वरबाट पक्राउ गरेको हो । 

बैंकिङ कसुर मुद्दामा उच्च अदालत पाटनले  २६ लाख जरिवाना गरेपछि श्रेष्ठ फरार रहेका थिए ।  ब्युरोका प्रवक्ता, प्रहरी उपरीक्षक श्यामकुमार महतोले उच्च अदालत पाटनको २०७८ असोज १० गतेको फैसलापछि पाँच दिन कैद र बिगोबमोजिम २६ लाख जरिवाना ठहर गरेपछि फरार रहेका श्रेष्ठलाई पक्राउ गरिएको जानकारी दिनुभयो ।

पक्राउ परेका श्रेष्ठले सिभिल बैंक लिमिटेड भक्तपुरको आफ्नो खातामा पर्याप्त मौज्दात नहुँदा नहुदै झुक्याएर चेक दिएर बैंकिङ कसुरजन्य अपराध गरेका थिए । उच्च अदालतले श्रेष्ठलाई बैकिङ कसूर तथा सजाय ऐन २०६४ बमोजिम उल्लेखित सजाय हुने गरी फैसला सुनाएको थियो । पक्राउ परेका श्रेष्ठलाई फैसला कार्यन्वयनका लागि शुक्रबारै काठमाण्डौ जिल्ला अदालतमा पेश गरिएको छ ।  
रासस