काठमाडौं । मोबाइल बैंकिङ प्रयोगकर्ताको संख्या दिनप्रतिदिन बढ्दै गहिरहेको छ । चालु आर्थिक वर्षको वैशाख मसान्तसम्म मोबाइल बैंकिङ प्रयोगकर्ताहरूको संख्या १ करोड ७६ बढी रहेको राष्ट्र बैंकले जनाएको छ ।
 
सोमबार राष्ट्र बैंकले सार्वजनिक गरेको तथ्यांक अनुसार बैशाख ३१ गतेसम्म मोबाइल बैंकिङ प्रयोगकर्ताहरूको संख्या १ करोड ७६ लाख ७६ हजार २५९ पुगेको छ । जुन अघिल्लो वर्षको सोही अवधिको तुलनामा १.६६ प्रतिशतले बढी हो । अघिल्लो वर्ष २०७८ बैशाख मसान्तसम्म मोबाइल बैंकिङ सेवा प्रयोगकर्ताहरूको संख्या कुल १ करोड ७३ लाख ८२ हजार ४४८ रहेको थियो ।

यस्तै, आर्थिक वर्षको बैशाख मसान्तसम्म मोबाइल बैंकिङ प्रविधिबाट मात्र कुल ११ अर्ब ३६ करोड २२ लाख रुपैयाँ बराबरको कारोबार भएको राष्ट्र बैंकले जनाएको छ ।

यस्तै, राष्ट्र बैंकको अनुसार समीक्षा अवधिमा भूक्तानीको औजार वालेट प्रयोगकर्ता १ करोड ४८ लाख ८४ लाखबाट १ अर्ब ४६ करोड ६० लाख रुपैयाँ कारोबार भएकोमा १ करोड ४ लाख ६२ हजार ६०८ वटा डेबिट कार्ड (एटीएम) बाट ८ अर्ब १ करोड ९२ लाख रुपैयाँ, २ लाख १५ हजार १८ जना क्रेडिट कार्ड प्रयोगकर्ताहरूबाट १२ करोड ४५ लाख रुपैयाँ र २ लाख ५२ हजार ७०५ जना इन्टरनेट बैंकिङ प्रयोगकर्ताहरूबाट १ अर्ब १९ करोड १७ लाख रुपैयाँ बराबरको कारोबार भएको छ ।

अन्य डिजिटल भुक्तानीका साधनहरु कनेक्ट आईपीएस, प्रिपेडकार्ड, आरटीजीएस लगायतका प्रणालीबाट पनि अर्बौंको कारोबार भएको राष्ट्र बैंकले जनाएको छ ।