काठमाण्डौं, पुस १८
बैंकका सञ्चालकहरुले बैंक तथा वित्तीय संस्थाहरूको पुँजी तत्कालका लागि वृद्धि नगर्न माग गरेका छन । नेपाल राष्ट्र ब्रैक समक्ष बैंक तथा वित्तीय संस्था परिसंघ नेपाल (सिबिफिन) ले बैंक तथा वित्तीय संस्थाका अप्ठ्यारा तथा चुनौतीका विषयमा अध्ययन गरी  प्रतिवेदन बुझाउँदै पुँजी नबढाउन माग गरेको हो ।

राष्ट्र बैंकले  मौद्रिक नीतिमार्फ  दुई वर्षभित्रमा चुक्ता पुँजी चार गुणाले बढाउने नीति ल्याएको थियो। तर बैंक तथा वित्तीय संस्थाको संख्या घटेन । हकप्रद सेयरको माध्यमबाट पनि पुँजी बढाउन दिँदा मर्जरमा जानुको सट्टा बैंक तथा वित्तीय संस्थाले छोटो समयमा हकप्रद सेयर जारी गरेरसमेत चार गुणाले पुँजी बढाए । जसकारण उपलब्ध कोषलाई उपयोग गर्न आक्रामक कर्जा विस्तार गर्दा तरलता अभावजस्ता समस्या देखिएको सो अध्ययनमा उल्लेख छ । बैंकहरुलाई बैंकको प्रतिफल  घटेको चिन्ता छ। 

सो प्रतिवेदन अनुसार २०७३ सालदेखि बैंक तथा वित्तीय संस्थाको प्रतिसेयर आम्दानी र प्रतिफल दर निरन्तर रूपमा घटिरहेको  छ।  जसकारण बैंकका लगानीकर्ता निरुत्साहित भएको भन्दै उक्त चुनौती व्यवस्थापनका लागि खुल्ला बजारको अवधारणाअनुसार नै व्याजदर निर्धारण हुने व्यवस्था मिलाउनसमेत आग्रह ग गरेको प्रतिवेदनमा उल्लेख छ। 

परिसंघले उपाध्यक्ष राजेश उपाध्यायको संयोजकत्वमा कार्यदल गठन गरिएको थियो । गठन भएको करिब नौ महिना लगाएर तयार पारेको प्रविवेदन गत मंगलबार गभर्नर महाप्रसाद अधिकारीलाई बुझाइएको  थियो ।