काठमाडौं । नेपाल राष्ट्र बैंकले विभिन्न कोषमा रहेका २२ करोड ३२ लाख रुपैयाँ बराबरको रकम मुद्दती निक्षेपमा लगानी गर्ने भएको छ । राष्ट्र बैंकले ‘क’ वाणिज्य बैंकमा १७ करोड ८७ लाख, ‘ख’ राष्ट्रिय स्तरका विकास बैंकमा ३ करोड ३४ लाख र राष्ट्रिय स्तरका  ‘ग’ वित्त कम्पनीमा १ करोड ११ लाख रुपैयाँ गरी कूल २२ करोड ३२ लाख रुपैयाँ लगानी गर्न लागेको हो ।

असार १ देखि २०८० जेठ ३२ गतेसम्म ३६६ दिनका लागि उक्त रकम बैंक तथा वित्तीय संस्थाको मुद्दती निक्षेपमा लगानी गर्न लागिएको  राष्ट्र बैंकले एक सूचना मार्फत जानकारी दिएको छ ।

बैंक तथा वित्तीय संस्थाले जेठ २० गते राती १२ बजेभित्र आफूले लिन चाहेको रकम तथा उक्त रकमका लागि प्रस्ताव गरिएको व्याजदर समेत खुलाएर राष्ट्र बैंकमा पेस गर्नुपर्नेछ ।