भारत । भारत सरकारले नेपाललाई १.७ लाख टन युरिया र डायमोनियम फोस्फेट (डीएपी) मल सहयोग गर्ने भएको छ । भारतले यसै वर्ष तोकिएको परिमाणमा मल नेपाल पठाउनलागेको टाइम्स अफ इन्डियाले जनाएको छ ।

यसैगरी भारतले अहिलेकै १ अर्ब अमेरिकी डलर ऋणअन्तर्गत श्रीलंकालाई पनि ६५ हजार टन युरिया मल आपूर्ति गर्ने भएको छ ।

आर्थिक संकटमा गुज्रिरहेको श्रीलंकालाई सहयोग गरिरहँदा नेपाललाई भने चीनबाट सहयोग लिनुअघि नै रणनैतिक रुपमा मल सहयोग गर्न लागिएको भारतीय स्रोतले बताएको छ । 

भारतीय स्रोतका अनुसार भारतले १.२ लाख टन युरिया र ५० हजार टन डीएपी मल पठाउनेछ । त्यसैगरी भुटानलाई पनि भारतले ५३ सय टन डीएपी मल पठाउन लागेको जनाइएको छ । 

रासायनिक मल निर्यातमा प्रतिबन्ध रहिरहँदा भारतबाट युरिया मल पाउने श्रीलंका नेपालपछि दोस्रो देश रहेको बताइएको छ । नेपालले दुई देशबीच भएको समझदारीअनुसार रासायनिक मल पाउनलागेको हो ।