काठमाण्डौं । चालु आर्थिक वर्षको चैत मसान्तसम्म २३२ उद्योग दर्ता भएका छन् । गत वर्षको सोही अवधिमा १६९ स्वदेशी तथा विदेशी उद्योग दर्ता भएका थिए । हालसम्म ८ हजार ६८७ उद्योग दर्ता भएको उद्योग विभागले जनाएको छ । 

चालु आर्थिक वर्षको नौ महिना अवधिमा ६७ ठूला, ८२ मझौला र ८३ साना उद्योग दर्ता भएका छन्। अधिल्लो आर्थिक वर्षको सोही अवधिमा ३३ ठूला, ४० मझौला र ९६ साना उद्योग दर्ता भएका थिए ।

विभागले जनाए अनुसार हालसम्म १ हजार २८१ ठूला, एक हजार ९९१ मझौला र ५ हजार ४१५ साना उद्योग दर्ता भएका छन् ।

चालु आर्थिक वर्षको नौ महिना अवधिमा ६७ ठूला, ८२ मझौला र ८३ साना उद्योग दर्ता भएका छन्।

औद्योगिक व्यवसाय ऐन, २०७६ अनुसार  १५ करोडसम्म स्थिर पूँजी भएका उद्योगलाई साना,  १५ देखि ५० करोडसम्म स्थिर पूँजी भएका उद्योगलाई मझौला र ५० करोडभन्दा बढी स्थिर पूँजी भएका उद्योगलाई ठूला उद्योग मानिन्छ ।

चालु आर्थिक वर्षको तेस्रो त्रैमाससम्म २३२ उद्योगमा  २ खर्ब ६६ अर्ब लगानी प्रस्ताव भएका छन् ।

गत आर्थिक वर्षमा प्रस्तावित लगानी १ खर्ब ३९ अर्ब थियो । हालसम्म  २५ खर्ब ५० अर्बको लगानी प्रस्ताव भएका छन् । चैत मसान्तसम्म २३ वटा डिजाइन, २ हजार ३५६ ट्रेडमार्क दर्ता गरिएको विभागले जनाएको छ । 

कम्पनी रजिष्टारको कार्यालयले कर्मचारीको अभावमा अत्यावश्यक सेवा मात्र प्रवाह गर्न थालेको छ । आसन्न स्थानीय तह निर्वाचनमा अधिकांश कर्मचारी खटिएकाले यही वैशाख २३ गतेदेखि अत्यावश्यक परेका कम्पनी दर्ता, कम्पनी प्रशासन र अभिलेखसम्बन्धी काम मात्र सञ्चालन गरिएको कार्यालयले जनाएको छ । 

अत्यावश्वकबाहेक अन्य कार्य स्थानीय तह निर्वाचनपश्चात् पूर्णरुपमा सञ्चालनमा आउने उद्योग विभागले जनाएको छ  ।