काठमाडौं । नेपाल राष्ट्र बैंकले उपदान तथा पेन्सन कोषमा रहेको २ अर्ब रुपैयाँ वाणिज्य बैंक, विकास बैंक र फाइनान्स कम्पनीको मुद्दती निक्षेपमा लगानी गर्ने भएको छ।

केन्द्रिय बैंकले ’क’ वर्गका वाणिज्य बैंकमा १ अर्ब ६० करोड ५ लाख, ’ख’ वर्गका राष्ट्रिय स्तरका विकास बैंकहरुमा ३० करोड र ’ग’ वर्गका राष्ट्रिय स्तरका वित्त कम्पनीमा १० करोड गरी कुल २ अर्ब ५ लाख रुपैयाँ मुद्दती निक्षेपमा लगानी गर्न लागेको हो।

केन्द्रिय बैंकले उक्त निक्षेप २०७९ असोज २ गतेदेखि २०८० असोज १ गतेसम्म ३६६ दिन अवधिको लागि राख्न लागेको हो।

उक्त निक्षेप लिन चाहने बैंक तथा वित्तीय संस्थाहरुले रकम खुलाई भदौ २२ गते राती १२ बजेसम्ममा ब्याजदर प्रस्ताव पेश गरिसक्नुपर्ने छ।

राष्ट्र बैंकको निक्षेप लिनको लागि बैंक तथा वित्तीय संस्था सञ्चालनमा आएको कम्तीमा दुई वर्ष पुरा गरेको हुनुपर्ने छ भने राष्ट्र बैंकले तोकेको न्यूनतम पूँजी कोष कायम हुनुपर्ने छ।

त्यसैगरी, निष्कृय कर्जा कुल कर्जा सापटीको पाँच प्रतिशतभन्दा कम रहेको हुनुपर्ने, खुद तरल सम्पत्ति स्वदेशी निक्षेपको कम्तीमा २० प्रतिशत वा सो भन्दा बढी रहेको हुनुपर्ने, कर्जा र स्वदेशी निक्षेप र प्राथमिक पूँजी अनुपात बैंकले समय समयमा निर्धारण गरेको सीमा भित्र रहेको हुनुपर्ने लगागतका शर्तहरु राष्ट्र बैंकले तोकेको छ।