काठमाडौँ,
अर्थमन्त्री जनार्दन शर्माले आइतबार साँझ पदभार ग्रहण गर्नुभएको छ ।

राष्ट्रपति कार्यालय शीतल निवासमा राष्ट्रपति विद्यादेवी भण्डारीसमक्ष पद तथा गोपनीयताको शपथ लिएपछि मन्त्री शर्माले आजै सिंहदरबारस्थित कार्यकक्षमा पुगेर पदभार ग्रहण गर्नुभएको हो ।

चालु आर्थिक वर्षको बजेट निर्माणका क्रममा अनाधिकृत व्यक्तिलाई संलग्न गराएको अभियोग लागेपछि उहाँले गत असार २२ गते प्रतिनिधिसभामा सम्बोधन गर्दै राजीनामा दिनुभएको थियो । आज मात्रै नेकपा (माओवादी केन्द्र) का तर्फबाट अर्थमन्त्रीमा शर्मालाई नियुक्त गर्न प्रधानमन्त्री शेरबहादुर देउवालाई सिफारिस गरेको थियो । 

सोही आधारमा प्रधानमन्त्री शेरबहादुर देउवाको सिफारिसमा राष्ट्रपति विद्यादेवी भण्डारीले शर्मालाई अर्थमन्त्रीमा नियुक्त गर्नुभएको थियो ।

पदभार ग्रहणपछि आयोजित कार्यक्रममा उहाँले विश्वव्यापी रुपमा अर्थतन्त्रमा समस्या देखिएको र त्यसको असर नेपालको अर्थतन्त्रमा पनि परेको भन्दै आन्तरिक रुपमा सबलीकरण गर्न लागिपर्ने बताउनुभयो ।  

उहाँले भन्नुभयो, “हाम्रो अर्थतन्त्रको सबलीकरण गर्न लागिपर्छु ।” मन्त्री शर्माले त्यसका लागि आयात प्रतिस्थापन गर्दै निर्यात बढाउने गरी काम गर्नुपर्ने बताउनुभयो ।