काठमाण्डौं । यस वर्ष कर नबुझाउनेमा चिकित्सक, इन्जियिर, वकिल, सल्लाहकार, लेखापरीक्षक, कलाकार, खेलाडी, शिक्षक प्राध्यापकलगायतका पेशाविद् रहेका छन् ।

महालेखापरीक्षकको कार्यालयको ५९ औँ वार्षिक प्रतिवेदन अनुसार चिकित्सक, इन्जियिर, वकिल, सल्लाहकार, लेखापरीक्षक, कलाकार, खेलाडी, शिक्षक प्राध्यापकलगायतका पेशाविदहरुले स्थायी लेखा नम्बर नलिएको र लिएकाले समेत आय विवरण दाखिला गरेका छैनन् । 

आयकर ऐन, २०५८, मूल्य अभिवृद्धि कर ऐन, २०५२ र अन्तःशुल्क ऐन, २०५८ मा पेशा, व्यवसाय वा कारोबार गर्दा तोकिएबमोजिम दर्ता हुनुपर्ने तथा इजाजत लिनुपर्ने व्यवस्था छ । 

कार्यालयका अनुसार आर्थिक वर्ष २०७७/७८ सम्म व्यवसायिक स्थायी लेखा नम्बर लिनेहरु १५ लाख ७७ हजार ३८३, व्यक्तिगत स्थायी लेखा नम्बरमा २४ लाख ७१ हजार ७२६, अग्रिम कर स्थायी लेखा नमबर लिनेको संख्या ९ हजार ९ सय ९८ रहेको छ । यस अवधिमा करमा दर्ता भएका एंव एजाजत लिने करदाताको संख्या कुल ४० लाख ५९ हजार १०७ रहेको छ । यी सबै करको दायरामा आएको कार्यालयले जनाएको छ । 

यस्तै सोही वर्ष मूल्य अभिवृद्धि कर दर्ता गर्नेको संख्या २ लाख ६८ हजार ४३६ रहेको छ भने अन्तःशुल्क इजाजतपत्र लिनेहरु १ लाख ३ हजार ४२३ रहेका छन् । 

कार्यालयका अनुसार २०७६/७७ को तुलनामा २०७७/७८ मा स्थाीय लेखा नम्बर लिने करदाताको संख्यामा आयकरतर्फ १८.९, मूल्य अभिवृद्धि करतर्फ ४.८७ र अन्तःशुल्क इजाजतपत्रतर्फ ९.६८ प्रतिशत वृद्धि भएको छ ।