काठमाण्डौं

राष्ट्रिय गौरवको आयोजना गौतम बुद्ध अतराष्ट्रिय विमान स्थलको भौतिक काम सम्पन्न भएको छ । विमान स्थलको भौतिक काम ९८.७५ प्रतिशत सकिएको आयोजना प्रमुख प्रवेश अधिकारीले जानकारी दिनुभयो । 

उँहाका अनुसार विमानस्थलमा रनवे लाइट, यान्त्रिक अवतरण प्रणाली, सञ्चार उड्डयन सहायक उपकरणहरू, ब्यागेज ह्यान्डलिङ सिस्टम, एक्सरेलगायत आवश्यक उपकरणहरू जडान भइसकेको छ। अब सरसफाइको काम मात्र बाँकी रहेको उँहाले बताउनुभयो ।

लामो समयपछि अन्तिम चरणमा पुगेको विमान स्थलको काममा कुल लागतको ५ अर्ब ३१ करोड ९६ लाख (७८ प्रतिशत) रकम खर्च भएको आयोजनाका प्रमुख प्रवेश अधिकारीले जानकारी दिनुभयो । आयोजनाको कुल लागत  ६ अर्ब ८२ करोड रुपैयाँमा रहेको उहाँले बताउनुभयो ।

गौतम बुद्ध अन्तिराष्ट्रिय विमान स्थलको शिलन्यास सन् २०१५ जनवरी १५ मा तत्कालिन प्रधानमन्त्री सुशिल कोइरालाले गर्नुभएको हो । सो आयोजना निर्माण सुरु भएको मितिदेखि डिसेम्बर २०१७ सम्म सकिनुपर्ने थियो । तर सकिएन । त्यसपछि पहिलो पटक म्याद थपेर १५ जुन २०१८ सम्मलाई लम्ब्याइयो । यस समयसम्म पनि सम्पन्न भएन । फेरी दोस्रो पटक २८ जुन २०१९ सम्मका लागि म्याद थपियो । दोस्रो पटकसम्म पनि म्याद थप गर्दा काम सम्पन्न नभएपछि तेस्रो पटक डिसेम्बर २०१९ सम्म कायम गरिएको थियो । कोरोना महामारी लगायतका कारणले धकेलिएको विमान स्थलको काम अन्तिम चरणमा पुगेको हो ।

नेपाल नागरिक उड्डयन प्राधिकरणका महाप्रबन्धक राजकुमार श्रोत्रीले विमानस्थलमा चाँडै क्यालिब्रेसन फ्लाइट गरेर वैशाखदेखि उडान सुरु गर्ने लक्ष्य रहेको बताउनुभयो । 
उँहाका अनुसार प्राधिकरणले पहिले नै क्यालिब्रेसन फ्लाइट गर्न खाजेको तर विभिन्न कारणले रोकिएको थियो । तर  आफूहरुले क्यालिब्रेसन फ्लाइट छिटोभन्दा छिटो गर्न प्रयास गरिरहेको बताउनुभयो ।

यहि पुस १६ गते प्राधिकरणको २३ औँ वार्षिकोत्सव कार्यक्रममा पर्यटन मन्त्री प्रमेबहादुर आलेले वैशाखसम्म विमानस्थल सञ्चालनमा आउने गरी काम गर्न प्राधिकरणलाई निर्देशन दिनुभएको थियो।