काठमाण्डौं । संसदीय समितिले आसन्न अमेरिका भ्रमणका बारेमा जानकारी लिन प्रधानमन्त्री शेर बहादुर देउवालाई बोलाउने निर्णय गरेको छ ।

सिंहदरबारमा सोमबार बसेको प्रतिनिसिसभा अन्तर्गतको अन्तर्राष्ट्रिय सम्बन्ध समितिले आगामी असार ५ गते अमेरिका भ्रमणका बारेमा जानकारी लिन प्रधानमन्त्रीलाई बोलाउने निर्णय गरेको हो ।यसअघि प्रधानमन्त्री देउवाको अमेरिका भ्रमणबारे संसदलाई जानकारी गराउन एमालेले माग गरेको थियो ।

यस्तै बैठकले नेपालको परराष्ट्र नीतिका बारेमा छलफल गर्न असार ३ गते परराष्ट्रमन्त्री डा. नारायण खड्कालाई समितिमा बोलाउने निर्णय गर्दै यसका लागी पत्राचार गरिने समिति सभापति पबित्रा निरौलाले जानकारी दिनुभयो ।

बैठकमा समिति सदस्यहरुले प्रधानमन्त्रीको अमेरिका भ्रमणका बोरमा अनेक आशंका पैदा भएको भन्दै सरकारले स्पष्ट पार्नुपर्ने धारणा राखेका थिए ।सांसद माधव कुमार नेपालले नेपालको परराष्ट्र मामिलामा कुनै पनि हस्तक्षेप स्वीकार्य नहुने बताउनुभयो ।

सांसद प्रदीप ज्ञवालीले प्रधानमन्त्रीको भ्रमणको व्यवस्थापनमा नै प्रश्नचिन्ह उठेको बताउनुभयो । उहाँले अमेरिकामा विभिन्न सहमति हुने चर्चा सुनिएको भन्दै प्रष्ट हुनुपर्ने उल्लेख गर्नुभयो ।

यस्तै सांसद भीम रावलले समितिमा जानकारी गराउदा प्रधानमन्त्रीले अपमानका रुपमा सोच्न नहुने बताउनुभयो । बैठकमा अन्य सदस्यहरुले मुलुकको राष्ट्रियतालाई मध्यनजर गर्दै नेपालको परराष्ट्र नीतिलाई प्रभावकारी रुपमा कार्यान्वयन गर्नुपर्ने धारणा राखेका थिए ।