काठमाण्डौं । स्थानीय तहको चुनाव सकिएर जनप्रतिनिधिहरुले पदभार ग्रहण गर्ने काम भर्खरै सम्मपन्न भएको छ । यसको सँगसँगै प्रतिनिधिसभा र प्रदेशसभाको आवधिक निर्वाचन गर्नु पर्ने हुन्छ ।

यसै विषयलाई मध्येनजर गर्दै राजनीतिक दलहरुले आगामी कात्तिक अन्तिम साता वा मंसिर पहिलो साता निर्वाचन गर्न छलफल अघि बढाएका छन् ।

मंगलबार प्रधानमन्त्रीको सरकारी निवास बालुवाटारमा बसेको बैठकमा कात्तिक अन्तिम साता वा मंसिर पहिलो साता निर्वाचन गर्ने गरी प्रस्ताव आएको बैठकमा सहभागी नेकपा माओवादी केन्द्रका नेता नारायणकाजी श्रेष्ठले जानकारी दिनुभयो ।

२०७४ को सालमा मंसिर १० गते र २१ गते गरी दुई चरणमा निर्वाचन भएको थियो । तर पनि निर्वाचित सांसदहरुले फागुन २० गते मात्र शपथ ग्रहण गरेकाले त्यही दिनदेखि पाँच वर्षको कार्यकाल गणना हुन्छ ।