काठमाण्डौं । नेकपा माओवादी केन्द्रका अध्यक्ष पुष्पकमल दाहाल प्रचण्डले स्थानीय तहको चुनावमा गठबन्धनबीच भएको तालमेल प्रभावकारी हुन नसकेको बताउनुभएको छ ।

बुधबार काठमाण्डौंमा पार्टीको तर्फबाट देशभरका स्थानीय तहको प्रमुख तथा उपप्रमुखमा निर्वाचित जनप्रतिनिधिहरुको अभिमुखीकरण कार्यक्रमको उद्घाटन गर्दै प्रचण्डले स्थानीय तहको चुनावमा गठबन्धनबीच भएको तालमेल प्रभावकारी हुन नसकेपछि प्रदेश र संघको चूनावमा गठबन्धन कायमै रहने बताउनुभयो ।

आफूहरु कांग्रेस नेतृत्वको गठबन्धनलाई निरन्तरता दिने पक्षमा रहेको उहाँले बताउनुभयो ।उहाँले गठबन्धनभित्रको माओवादीको स्वरुप परिवर्तन गर्नुपर्ने देखिएको जिकिर गर्नुभयो ।

उहाँले माओवादीप्रति जनताको मोह भंग नभइसकेको भन्दै सच्चिओस् भन्ने सन्देशका साथ तेस्रो शक्ति बनाएर राष्ट्रिय राजनीतिको चाबी हातमा राखिदिएको उल्लेख गर्नुभयो ।

प्रचण्डले विगतमा एमालेसँग गठबन्धन र पार्टी एकता गर्दा उद्देश्य एउटै भएपनि नेतृत्वमा धेरै अहंकार आएपछि त्यसका विरुद्ध विद्रोह गर्नुपर्ने ठाउँमा आफूहरु पुगेको भन्दै कांग्रेसबाट पनि अहिले त्यस्तै डर पैदा भएको उल्लेख गर्नुभयो ।

त्यस्तै उहाँले स्थानीय तहको निर्वाचनपछि एमाले अत्तालिएको तर्क गर्नुभयो । प्रमुख तथा उपप्रमुखमा निर्वाचित जनप्रतिनिधिहरुको अभिमुखीकरण कार्यक्रम दुई दिनसम्म चल्ने माओवादीले जनाएको छ ।