काठमाण्डौं, पुस १९
इलामको माई नगरपालिका–८ का सविन राई सन् २०१२ मा वैदेशिक रोजगारीका लागि मलेशिया जानु भएको थियो । ६ वर्ष विदेशमा बस्दा विरामी भएपछि सामान्य उपचार मलेशियामा नै गरेपछि राई बिदा मागेर थप उपचारका लागि  नेपाल आउनुभयो । 
बिदामा बसेकै समयमा गाउँमा युवा सशक्तीकरण कार्यक्रम सञ्चालनको तयारी भइरहेको थियो । जर्मन सरकारको सहयोगमा जिल्लास्थित मानव अधिकार मञ्च नेपालद्वारा उक्त कार्यक्रममा आबद्ध भएर तालिम लिएपछि दुई सुँगुरका पाठा खरिद गरेर ५ हजार ५ सयले दुई वटा बङ्गुरका पाठाबाट काम सुरु गर्नु भयो ।  

व्यावसायिकरूपले बङ्गुर पाल्नका लागि थप पाठा खरिद गदै व्यवसाय सुरु गर्दा सोही परियोजनाले करिव १२ हजार सहयोग गरेको थियो । तालिम र बीउ पुँजीबाट हाल १५ वटा माउ सुँगुर र अन्य गरी ३० वटा सुँगुर पाल्दै आउनुभएको  र हाल मासिक ३० हजारसम्म कमाउन थालेको बताउनुभयो ।  

वडा नं ९ चिसापानीकी रञ्जना राई पनि हाल व्यावसायिक बङ्गुरपालनमा लाग्नुभएको छ । पहिला एउटा मात्र बङ्गुर पाल्दै आउनुभएकी कार्यक्रम सुरु भएपछि व्यावसायिकरुपमा नै सुँगुर पाल्न थाल्नुभएको हो । रन्जनाले अहिले १० वटा सुँगुर पाल्नुभएको छ । गएको चैत महिनाबाट व्यवसाय सुरु गर्नुभएकी  उक्त मञ्चको कार्यक्रमबाट पाँच हजार र माई नगरपालिकाबाट  १२ हजार ४ सय ८५ सहयोग प्राप्त भएको थियोे । रन्जनालाई अहिले बङ्गुरपालन व्यवसायबाट खान, लाउन र घरखर्च चलाउन सहज भएको छ । मासुबाट भन्दा पनि माउ सुँगुरबाट बढी आम्दानी हुने महसुस भएर उहाँले बढी माउ सुँगुर पाल्नुभएको हो । 
किसानलाई उक्त  कार्यक्रमले व्यावसायिक बन्न मद्दत गरेकोे छ । मञ्चले सन २०१९ बाट पालिकाका प्रत्येक वडामा १०ं/१० किसान भेला पारेर रुचिअनुसार बङ्गुरपालन, बाख्रापालन, कुुखुरापालन र तरकारी खेतीसम्बन्धी तालिम प्रदान गरेको थियो  । 
दुई स्थानीय तहमा सञ्चालित कार्यक्रम प्रभावकारी भएपछि अन्य दुई पालिकामा समेत कार्यक्रम थप भएको छ । आप्रवासी सामाजिक रुपान्तरणका लागि युवा परियोजना कार्यक्रम सञ्चालनमा आएपछि स्थानीय किसान व्यावसायिक हुन थालेका हुन् । सन् २०२० बाट चुलाचुली गाउँपालिका र सन् २०२१ बाट माईजोगमाई गाउँपालिकामा कार्यक्रम थप गरिएको थियो । सन् २०२२ मा भने चुलाचुली र माईजोगमाई गाउँपालिकामा एकसाथ यो कार्यक्रम सञ्चालन गरिने कार्यक्रम संयोजक सन्तोष मगरले जानकारी दिनुभयो ।

स्थानीय पालिकासँग समन्वय गरेर उक्त मञ्चले जर्मन सरकार र ए डब्लुओ नामक अन्तर्राष्ट्रिय संस्थासँगको सहकार्यमा कार्यक्रम सञ्चालन गरेको हो । विशेष गरेर १८ वर्षदेखि ३० वर्ष उमेर समूहका युवालाई सामाजिक कार्यमा लगाउँदै व्यावसायिक बन्न कार्यक्रम सफल बन्ने अपेक्षा गरिएको छ ।

समूहसँगै युवायुवतीलाई स्वरोजगार बनाउने गरी परियोजनामार्फत हालसम्म ६ सय ६४ जनालाई उद्यमशीलता तालिम प्रदान गरिएको छ । ३ सय ५७ जनालाई सिपमूलक तालिमसमेत प्रदान गरेको  छ । परियोजनाले आफ्नो समय अवधिभर ४ सय ४० जनालाई उद्यमशीलता तालिम दिने लक्ष्य लिए पनि स्थानीय तहले थप १ सय २० जनालाई तालिमका लागि रकम र आवश्यक सामग्री उपलब्ध गराएको छ । हाल तालिम प्राप्त युवाले स्थानीय तह र घरेलु तथा साना उद्योग विकास कार्यालयमा आफ्नो उद्योग दर्ता गराउनसमेत थालेका छन । परियोजनामा सहभागी ८० प्रतिशत बढी युवाले विभिन्न व्यवसाय दर्ता गरेर व्यावसायिक बन्न सुरु गरेको कार्यक्रम संयोजक मगरको भनाइ थियो ।

सन् २०१९ मा एक जना बराबर  १० हजार, सन् २०२० र ०२१ मा एक जना बराबर  १२ हजार ४ सय ८५ का दरले सहयोग गर्दै आएको बताइएको छ । हालसम्म जम्मा  १३ लाख १० हजार ९ सय २५ युवालाई सामग्री खरिद भइसकेको र ती सामग्री कार्यक्रम सुरु भएका नयाँ स्थानीय तहमा प्रयोग  हुने बताइएको छ । परियोजना सम्पन्न गर्न २ करोड ९८ लाख १९ हजार ९२८ प्राप्त भएकामा सन् २०२१ मा प्रशासनिक खर्चतर्फ  ३२ लाख ३३ हजार २४७ खर्च गरिनेछ । कार्यक्रमतर्फ  ८४ लाख, ८८ हजार ५ सय खर्च हुने भएकोमा  प्रशासनतर्फ ३५ प्रतिशत र कार्यक्रमतर्फ ६५ प्रतिशत खर्च गरिने बताइएको छ