६ मंसिर, २०८१ बिहिबार
04:28:29 PM
१३ जेठ, २०७९
१० महिनामा ३६ अर्ब ९४ करोड १५ लाख २९ हजार रुपैयाँको ५३ लाख ६५ हजार ११५ थान मोबाइल आयात
काठमाण्डौं । नेपालमा मोबाइल फोनको आयात बढ्दो छ । करकोहिलाई मोबाइल चाहिएकै हुन्छ । साना बालबालिकादेखि वृद्धसम्मका हातमा मोबाइल फोन देखिन्छ । अझ विशेषगरी युवाहरुमा ‘लेटेस्ट’ मोबाइलको चलन बढि छ । र बजारमा पनि विभिन्न ब्राण्डका ‘लेटेस्ट’ मोबाइल आइरहन्छन् ।
नेपालमा चालु आर्थिक वर्षको १० महिनामा ३६ अर्ब रुपैयाँभन्दा बढिको मोबाइल फोन आयात भएको छ । भन्सार विभागको तथ्यांक अनुसार यस १० महिनामा ३६ अर्ब ९४ करोड १५ लाख २९ हजार रुपैयाँको ५३ लाख ६५ हजार ११५ थान मोबाइल आयात भएको छ ।
विभागका अनुसार गत वर्षको तुलनामा यस १० महिनामा बढि मोबाइल फोन भित्रिएका छन् । गत आर्थिक वर्ष २०७७/७८ मा नेपालमा ३६ अर्ब ९० करोड ४५ लाख ८४ हजार रुपैयाँको मोबाइल फोन आयात भएको थियो ।
बजारमा भिभो, ओप्पो, रिएलमी, एप्पल, सावमी, नोकिया, लगायतका स्मार्ट तथा सादा मोबाइल फोनको माग बढि छ । सबैसँग स्मार्ट फोन भएपनि उद्यमी, व्यवसायी कर्मचारी लगायतका हातमा स्मार्ट फोनसँगै सादा सेट पनि हुन्छ ।
यी सबै मोबाइल सेटहरु चीन, भारत, भियतनाम, युनाइटेड अरब इमिरेट्स र अमेरिकाबाट नेपाल भित्रिन्छन् । १० महिनामा चीनबाट २२ अर्ब १९ लाख ६० हजार रुपैयाँको मोबाइल फोन आयात भएको छ ।
यस्तै भारतबाट १२ अर्ब ५२ करोड २१ लाख ६७ हजार रुपैयाँ, भियतनामबाट १ अर्ब ६१ करोड ४६ लाख ९५ हजार रुपैयाँ, युनाइटेड अरब इमिरेट्सबाट २७ करोड २८ लाख ७७ हजार रुपैयाँ र अमेरिकाबाट १४ करोड २५ लाख ७४ हजार रुपैयाँको मोबाइल फोन भित्रिएको भन्सार विभागको तथ्यांकमा उल्लेख छ ।
