काठमाण्डौं, पुस १५
कोरोना महामारीको दुईलहरले शिथिल बनाएको होटल व्यवसायीलाई पुनःतेस्रो लहरको  महामारी (ओमिक्रोन) प्रक्षेपणले थप चिन्तित बनाएको छ । 
गत साउन महिनादेखि कोरोना सङक्रमणदर कम हुदै गर्दा धुलिखेलका होटल व्यवसायमा चहलपहल बढन थालेसँगै कार्यक्रमका बुकिङहरु बढदै गएका थिए । तर अहिले नेपालमा कोरोना तेस्रो लहर ओमिक्रोनको डरले धुलिखेलमा विदेशी पाहुना आउन छाडिसकेकोे, हाल आन्तरिक पर्यटक मात्रै धुलिखेल आउने गरेका छन् ।  
कोरोना महामारीका कारण होटल–व्यवसाय धरासायी हुँदा धुलिखेलका चार होटल बन्द भएका छन् । होटल निर्माणको ब्याज तथा घर भाडासमेत तिर्न नसक्दा धुलिखेलका होटल बन्द गर्नुप¥यो ।

 पर्यटकीयस्थल धुलिखेलमा ठूलासाना गरी करिब ६० होटल रहेका छन् । काभ्रेपलाञ्चोक स्थित धुलिखेलको होटल–पर्यटनमा मात्रै करिब ५० अर्बको लगानी रहेको होटेल व्यवसायी सङ्घले जनाएको छ । यसबाट ३ हजारभन्दा बढीले प्रत्यक्ष रोजगारी पाएका छन् । 

 तेस्रो लहरको कोरोना आउने र सावधानी अपनाउनुपर्ने सूचना सरकारी पक्षबाटै आउन थालेपछि होटल व्यवसायी निकै तनावमा छन् । होटल व्यवसाय चौपट हुने भयो, व्यवसायी टाट पल्टने भए । सामान्य खर्च नै धान्न नसक्ने परिस्थिति बनिरहँदा बैंकको ब्याज र किस्ता कसरी तिर्ने भन्ने चिन्तामा व्यवसायीहरु रहेका छन् ।
पर्यटकीयस्थल धुलिखेल सङ्घीय राजधानी काठमाडौंबाट करिब ३० किलोमिटरको दूरीमा अवस्थित छ । यहाँ बाह्य पर्यटकको अलावा काठमाडौं, भक्तपुर र ललितपुरका आवासीय कार्यक्रम समेत हुने गरेका छन् ।