काठमाण्डौं, पुस १४
 विश्व सम्पदा सूचीमा सूचीकृत हनुमानढोका दरबार क्षेत्रमा विदेशी पर्यटकको हिजोआज चहलपहल बढ्न थालेको छ । कोरोना जोखिम कम हुँदै गएपछि गत साउन महिनादेखि हनुमानढोका दरबार क्षेत्र विदेशी पर्यटकका लागि खुला गरिएको थियो । 

साउन महिनामा दक्षिण एसियाली देशका ११ र अन्य देशका ३८ गरी ४९ पर्यटक हनुमानढोका दरबार क्षेत्रमा आएका थिए । भदौ महिनामा अन्य देशका ७१ र दक्षिण एसियाली देशका ३० गरी १०१ पर्यटक आएको काठमाडौँ महानगरपालिका हनुमानढोका दरबार क्षेत्र संरक्षण कार्यक्रमका लेखा अधिकृत सुन्दरकाजी थुयाजुले बताउनु भयो । 

असोज महिनामा भने हनुमानढोका दरबार क्षेत्रमा विदेशी पर्यटकको सङ्ख्या ह्वात्तै बढेको थियो । असोजमा अन्य देशका ४ सय ७२ र दक्षिण एसियाली देशका १ सय ४९ गरी ६ सय २१ पर्यटकले हनुमानढोका दरबार क्षेत्रको भ्रमण गरेका थिए । असोजको तुलनामा कात्तिकमा दरबार क्षेत्रमा विदेशी पर्यटकको सङ्ख्या तीन गुणाले बढ्यो । कात्तिकमा  २ हजार १०३ विदेशी पर्यटक दरबार क्षेत्रमा आएका थिए। 

कोरोना भाइरसको नयाँस्वरुप ओमिक्रोन फैलन थालेकाले मङ्सिरमा भने पर्यटकको सङ्ख्या केही घटेको छ । मङ्सिरमा अन्य देशका १ हजार २ सय २० र दक्षिण एसियाली देशका ६ सय ५३ गरी १ हजार ८ सय ७३ पर्यटकले हनुमानढोका दरबार क्षेत्रको अवलोकन गरेका हुन। 

हनुमानढोका दरबार क्षेत्र भ्रमण गर्न आउने सार्क र बिम्स्टेक देशका नागरिकका लागि  १ सय ५० शुल्क लिइन्छ । अन्य देशका नागरिकलाई भने १ हजार लिने गरिएको लेखा अधिकृत खुयाजुले जानकारी दिनुभयो ।

पर्यटकबाट आर्थिक वर्ष २०७५÷२०७६ मा १८ करोड ७२ लाख २५ हजार ४ सय ५० आम्दानी भएको थियो । कोरोनाका कारण आव २०७६÷२०७७ मा ११ करोड ९९ लाख ६० हजार ५ सय ६० शुल्क उठेको छ । आव २०७७÷२०७८ मा १३ लाख ५८ हजार ४ सय ५० मात्र शुल्क उठेको कार्यालयले जनाएको छ । चालु आर्थिक वर्ष मङ्सिर मसान्तसम्म ३६ लाख शुल्क उठेको छ ।