काठमाण्डौं । अख्तियार दुरुपयोग अनुसन्धान आयोगले गण्डकी प्रदेश प्रहरी कार्यालय विपद् व्यवस्थापन गुल्म बाग्लुङमा कार्यरत प्रहरी नायब निरीक्षक रुपनारायण महतोविरुद्ध भ्रष्टाचार मुद्दा दायर गरेको छ ।

आयोगले महतोलाई सेवाग्राहीसँग ३८ हजार रुपैयाँ घुस लिएकोविरुद्ध आइतबार बिशेष अदालत काठमाडौंमा आरोपपत्र दायर गरेको हो । 

महतोले लेनदेन केस मिलाई दिने भनी सेवाग्राहीसँग ३८ हजार घुस माग गरेको बारे आयोगमा उजुरी परेको थियो । सोही उजुरीका आधारमा अख्तियार दुरुपयोग अनुसन्धान आयोगको कार्यालय पोखराबाट टोली खटिएको थियो ।

सोहि टोलीले महतोलाई सेवाग्राहीसँग ३८ हजार रुपैयाँ घुस लिइसकेको अवस्थामा बैशाख ६ गते नियन्त्रणमा लिएको थियो ।