काठमाण्डौं, पुस ११
नदीको बगरमा उखुखेती गर्न थालेपछि कञ्चनपुर लालझाडी गाउँपालिका किसानहरुको आम्दानीमा बृद्धि भएको छ । पछिल्लो वर्ष उनीहरुको आम्दानी ३ करोड ३४ लाखभन्दा बढिले बढेको थियो । यसले उखुखेती गर्ने किसानको दिनचर्या मै परिवर्तन ल्याइदिएको छ । 

आव २०७७÷७८ मा बगरमा लगाइएको उखुको उत्पादन ६३ हजार ७ सय ७२ क्वीन्टल भएको थियो । यसबाट किसानले  ३ करोड ३४ लाख ८० हजार ३ सय आम्दानी  गरेका छन् । आव २०७६÷७७ मा ३८ दशमलव ६७ बिघामा उखु लगाइएकामा ३ करोड २१ लाख ९२ हजार ४ सय १ आम्दानी भएको थियो ।

परियोजाका कार्यक्रम संयोजक महेश घिमिरेको अनुसार कृष्णपुर, शुक्लाफाँटा, बेलौरी नगरपालिका र लालझाडी गाउँपालिकामा गरी ५ सय ४३ दशमलव  २ बिघा जमिन र दोदा, स्याली, सनवोरालगायत नदीका बगरमा परियोजनाको सहयोगमा उखुखेती लगाउँदै आएको छ  । 

सबैभन्दा बढी बगरमा उखु खेती बेलौरी र पुर्नवासमा गरी २०१, लालझाडी गाउँपालिकामा १२३, शुक्लाफाँटामा ४० र कृष्णपुरमा आठ बिघामा उखु खेती हुदै आएको छ । 
उखु खेतीलगायतमा परियोजनाले स्थानीय तहसँग मिलेर ५३ प्रतिशत रकम लगानी गरेको संयोजक घिमिरेले बताउनु भयो ।