काठमाण्डौं–नेपाल विज्ञान तथा प्रविधि प्रज्ञा प्रतिष्ठान (नास्ट) र मसरुम सीड नेपाल एण्ड रिसर्च सेन्टर प्रा.लि.बीच सम्झौता भएको छ ।

सो समझदारी पत्रमा नास्टका विज्ञान संकायका प्रमुख डा.कान्ति श्रेष्ठ र मसरुम सीड नेपालका निर्देशक आकाश वाडेले हस्ताक्षर गरेका गर्नुभएको हो । 

बहुमूल्य रैथाने जङ्गली च्याउहरूको मूल्य अभिबृद्धिकरण खेती प्रविधि विकास गर्ने र अन्य प्रमुख आयातित च्याउहरूको ठाउँ सुहाउदो सरलता तथा उन्नत खेती प्रविधिको विकास गरी च्याउ उत्पादकहरूमा हस्तान्तरण गर्ने उद्देश्यले नास्ट र मसरुम सीड नेपालबीच सहकार्य भएको मसरुम सीड नेपालका निर्देशक आकाश वाडेले बताउनुभयो ।

यसका साथै समग्र राष्ट्रिय च्याउ उद्योगलाई उपयोगी हुने अनुसन्धान तथा विकास कार्यलाई संयुक्त रूपमा अघि बढाउन सहमत भई सहकार्यका लागि समझदारी गरेको उहाँको भनाइ छ ।

उक्त सम्झौतापश्चात नेपालमा च्याउ सम्बन्धी अध्ययन अनुसन्धान गर्न थप जिम्मेवारी प्राप्त भएको र उक्त सम्झौता हस्ताक्षर भएको मितिदेखि एक बर्षसम्म कायम रहने उहाँले बताउनुभयो । 

सम्झौता अनुसार नास्टले च्याउसम्बन्धी प्राविधिक अनुसन्धानहरूमा नेतृत्वदायी भूमिका खेल्नेछ भने नास्टमा उपलब्ध स्रोत र साधान च्याउ अनुसन्धानका लागि उपलब्ध गराउने भएको छ ।

यस्तै नास्टले च्याउ सम्बन्धी आवश्यक अन्य प्राविधिक सहयोग प्रदान गर्ने सम्झौतामा उल्लेख गरिएको छ भने फिल्डमा हुने अनुसन्धानहरूका लागि आवश्यक हुने स्थान, बिजुली, पानी, जनशक्ति आदिको व्यवस्था मसरुम सीड नेपालले गर्ने भएको छ ।

नास्ट र मसरुम सीड नेपालद्वारा जारी संयुक्त विज्ञप्तिअनुसार फिल्डको तथ्याङ्क सङ्कलन तथा व्यवस्थापन गर्ने र च्याउसम्बन्धी तालिम, गोष्ठी मेलालगायत अन्य जनचेतनामूलक गतिविधिहरू सञ्चालन गर्ने जिम्मेवारी मसरुसम सीड नेपालले प्राप्त गरेको छ ।

परियोजना अवधिमा विविध वौद्धिक सम्पत्ति वा प्रकाशनमा दुवै पक्षको समान साझेदारी हुने बताइएको छ ।

परियोजनाको प्रभावकारी वर्षिक कार्ययोजना तथा कार्यतालिका विकास गर्न र योजना अनुसार व्यवस्थित गर्न नाष्टका बरिष्ठ वैज्ञानिक अधिकृतको संयोजकत्वमा सदस्य रहने गरी मसरुम सीड नेपाल एण्ड रिसर्च सेन्टर प्रा.लि. भक्तपुरबाट २ जना रहने एक परियोजना अनुसन्धान टोली गठन गरिने विज्ञप्तिमा उल्लेख छ ।