बागलुङ । बागलुङको निसीखोला गाउँपालिकालाई  आलु र मकैको पकेट क्षेत्र घोषणा गरिएको छ । गाउँपालिकाले कृषि क्षेत्रको विकासका लागि ४० लाख बजेट यसै वर्ष विनियोजन गरेको छ । माथिल्लो उच्च क्षेत्रलाई आलु र तल्लो क्षेत्रलाई मकैको पकेट क्षेत्र घोषणा गरेको हो  । वडा नं २ आलु र मकै तथा वडा नं ५, ६ र ७ लाई आलुको पकेट क्षेत्र बनाएको कृषि शाखा प्रमुख ताराबहादुर परियारले जानकारी दिनुभयो ।

गाउँपालिकाले गत वर्ष सात वटै वडामा विभिन्न फलफूल तथा खाद्यबाली पकेट क्षेत्र घोषणा गरेकामा यस वर्ष चार वडालाई  आलु तथा मकैको पकेट क्षेत्र घोषणा गरिएको उहाँको भनाइ थियो । शाखा प्रमुख परियारले  पकेट क्षेत्रमा उपभोक्ता समिति निर्माण गरी सम्झौतासमेत भइसकेकाले अब काम अगाडि बढ्ने बताउनुभयो । वडा नं ५ र ६ आलु उत्पादनका लागि अत्यन्तै उर्वर भूमि मानिन्छ ।

यस  वर्ष वडा नं २ आलु र मकै तथा वडा नं ५, ६ र ७ लाई आलुको पकेट क्षेत्र घोषणा गरिएको  छ ।

यहाँका वडावासीले वर्षौंदेखि आलु उत्पादन गरी यसैबाट जीविकोपार्जनसमेत गर्दै आइरहेका छन् । निसेलढोर स्याउ र आलु उत्पादनका लागि बढी उर्वर भएपनि  गाउँपालिकाले त्यहाँ  कृषिका लागि बजेटको व्यवस्था गर्न नसकेको स्थानीयवासीले बताए  ।

ढोरपाटन सिकार आरक्षसमेत पर्ने निसेलढोरमा हरेक वर्ष स्थानीयवासीले लाखौँका स्याउ, आलु र सिमी उत्पादन गर्दै आएका छन् । त्यस क्षेत्रमा उत्पादन बढाउन गाउँपालिकाको ध्यान पुगेको थिएन । गाउँपालिकाले कृषिका लागि विभिन्न कार्यक्रम तथा बजेज समेट व्यवस्था गर्दै आएकोे यसबाट कृषकलाई उन्नत जातका बीउबिजन वितरण  र माटो शिविर सञ्चालन गरिने शाखाप्रमुख परियारले बताउनुभयो ।

गाउँपालिकाका अध्यक्ष तारानाथ पौडेलले कृषकलाई समय–समयमा कृषि परामर्श तथा तालिमसमेत दिँदै आएको र अब केही अनुदानका कार्यक्रम पनि सञ्चालन गरिने जानकारी दिनुभयो । यहाँका कृषकले अझै पनि परम्परागत खेती प्रणाली अपनाउँदै आएकाले अब आधुनिक प्रविधिको प्रयोग गर्न गाउँपालिकाले जोड दिँदै आएको जनाइएको छ ।