काठमाण्डौं, मंसिर २९
बुधबार नेपाल उद्योग वाणिज्य महासंघले गरेको नव उत्थान सम्मेलनको उद्घाटन कार्यक्रमलाई सम्बोधन गर्दै अर्थ मन्त्री जनार्दन शर्माले विद्युत बिक्री गरेर व्यापार घाटा कम नहुने बताउनु भएको छ । उहाँले विद्युत खपत गरी वस्तु उत्पादन र रोजगारी सृष्टि गरेर मात्र व्यापार घाटा कम गर्न सकिने बताउनु भएको छ ।
अर्थ मन्त्री शर्माले विद्युत महसुल घटाएर उत्पादन गर्ने उद्योगहरुलाई उपलब्ध गराउनु पर्ने बताउनु भयो । विद्युत उद्योगलाई नदिने अनि खेर फाल्ने किसिमको नीतिलाई सरकारले सच्याउँछ, किनभने एकातिर विद्युत खेर गइरहेको छ, अर्को तिर उद्योगले चलाउन पाएको छैन । यसले गर्दा  रोजगारी सृिष्ट हुन पाएको छैन ।

विशेषगरी उत्पादन गरेर निर्यात गर्न सक्ने किसिमको उद्योगलाई प्राथमिकतामा राखेर विद्युत सहुलियत उपलब्ध गराउनु पर्नेमा जोड दिनु भएको हो । यसले मुलुकलाई उत्पादनमुखी अर्थतन्त्र निर्माणमा टेवा पुर्‍याउने  उहाँले विश्वास व्यक्त गर्नुभयो । निति परिमार्जन गर्ने बारे मन्त्रालय र सम्बन्धित निकायसँग छलफल भइरहेको समेत मन्त्री शर्माले जानकारी दिनु भयो ।
निजी क्षेत्रले मुलुकको ग्राहस्था उत्पादनमा ठूलो योगदान गरिरहेको स्मरण गर्दै मन्त्री शर्माले निजी क्षेत्रकै सुझाव अनुसार आगामी नीति तय गरिने पनि बताउनु भयो ।