काठमाडौं । 
नेपाली कांग्रेसले अमेरिकाको एमसिसी सम्झोता पास गराउने सबै विकल्प अपनाउने भएको छ । काँग्रेस नेता मीन विश्वकर्माले एमसीसी पास गराउनको लागि आवश्यक सबै विकल्प र उपाय अपनाउने खुलाउनुभएको हो । बुधबार रिपोर्टर्स क्लब नेपालले आयोजना गरेको साक्षात्कारमा उहाँले एमसीसीलाई लिएर राष्ट्रिय राजनीति नै गिजोल्न नहुनेमा जोड दिनुभयो । 

एमसीसी देशको हितमा भएको उल्लेख गर्दै उहाँले सबै दल एकमत भएर यसलाई पारित गर्नुपर्ने बताउनुभयो । उहाँले भन्नुभयो, ‘देश ठप्प पारेर देशभरी सर्वहारै–सर्वहारा बनाउने कुरा कांगे्रसलाई मान्ने छैन । एमसीसीका लागि निवेदन हालेको पनि कांग्रेसले होइन हामीले पत्राचार गरेको पनि होइन । हामीले परियोजना बनाएको पनि होइन ।

सबै कुरा हेर्दा नेपालीको हितमा भएको भएर हामी हस्ताक्षर गर्न गयौँ र एमसीसी पास गर्नलाई उभिएका छौँ ।’ आफूहरु प्रतिपक्षमा हुँदा पनि एमसिसीको पक्षमा भएको र अहिले सत्ता पक्षमा हुँदा पनि एमसिसीकै पक्षमा रहेको उहाँले बताउनुभयो ।
 
यस्तै एमाले नेता कर्णबहादुर थापाले एमसिसीलाई लिएर सत्ता गठबन्धनले नाटक देखाउन नहुने टिप्पणि गर्नुभयो । अहिलेको सरकारले सदनमा पेश गरेका कुनै पनि बिजनेशहरु सरकारमा सहभागी भएका दलहरु नै बढी जिम्मेवार हुने उहाँको भनाई छ । एमसिसीलाई लिएर नेकपा माओवादी केन्द्र र नेकपा एकीकृत समाजवादीको भूमिकालाई लिएर उहाँले कडा आपत्ति जनाउनुभयो ।  

यसैगरी माओवादी नेता झक्कुप्रसाद सुवेदीले अहिलेको सरकार विषम परिस्थितिमा बनेको भन्दै माओवादीले त्यत्तिकै सरकार नछोड्ने बताउनुभयो  । एमसिसीलाई लिएर आफूहरु र कांग्रेसको एजेण्डा नमिलेको पनि उहाँको धारणा छ । 

लोकतान्त्रिक समाजवादी पार्टी, नेपालका  नेता केशब झाले आफ्नो पार्टी एमसिसीको पक्षमा सुरुदेखि नै रहेकोले यसको पक्षमा नै मत हाल्ने स्पष्ट पार्नुभयो । झाले एमसिसी राष्ट्रको हितमा रहेको भन्दै पूर्वाधार क्षेत्रमा विकास हुने विश्वास व्यक्त गर्नुभयो ।