काठमाण्डौं
नेपाल सरकारको स्वमित्वमा रहेको खाद्य व्यवस्था तथा व्यापार कम्पनी लिमिटेडले १ लाख ६२ हजार ५ सय क्विन्टल चामल खरिद गर्ने भएको छ । कम्पनीले यस लटमा करिब ९३ करोड १८ लाख मूल्य बराबरको चामल खरिद गर्न लागेको हो । कम्पनीले आफ्नो लक्ष्य अनुसार धान खरिद गर्न नसकेपछि चामल खरिद गर्न लागेको छ ।

चामल खरिदका लागि टेन्डर आह्वान गरिएको छ । हाम्रो बजेटको सीमा ९३ करोड १८ लाखको हो, यसैको आधारमा १ लाख ६२ हजार ५ सय क्किन्टल चामल खरिद गर्न सकिने टेन्टिटिभ योजना रहेको कम्पनीकी प्रवक्ता सर्मिला न्यौपाने सुवेदीले बताउनु भयो । खुला प्रतिस्पर्धाबाट सबैभन्दा सस्तो कबोलमा तोकिएको मापदण्डको चामल उपलब्ध गराउने कम्पनीबाट खरिद गछौं । पहिले गुणस्तर युक्त धान नपाएपछि चामलै खरिद गर्ने निर्णयमा कम्पनी पुगेको प्रवक्ता सुवेदीले बताउनु भयो । 

 हाम्रो बजेटको सीमा ९३ करोड १८ लाखको हो, यसैको आधारमा १ लाख ६२ हजार ५ सय क्किन्टल चामल खरिद गर्न सकिने टेन्टिटिभ योजना रहेको कम्पनीकी प्रवक्ता सर्मिला न्यौपाने सुवेदीले बताउनु भयो ।

 हरेक वर्ष कम्पनीले धान किनेर कुटाएर बिक्री गर्दै आएको थियो । तर यस पटक लक्ष्य अनुसारको धान खरिद गर्न नसकिएकोले चामलको लागि टेण्डर आह्वान गरेका हौं । उहाँका अनुसार अहिलेसम्म विभिन्न जिल्लामा ७ हजार ४ सय ४२ क्विन्टल धान खरिद गरिएको छ । चालु आर्थिक वर्षमा कम्पनीले ३ लाख २० हजारक्विन्टल धान खरिद गर्ने लक्ष्य रहेकोमा यस वर्ष एकदमै कम परिमाणमा धान गरिद गरेको छ । व्यवसायीहरुले धान पाक्ने समयमानै किसानबाट धान गरिद गरेपछि बजारमा अभाव सृजना भयो त्यसैले कम्पनीले आफ्नो लक्ष्य अनुरुपको धान खरिद गर्न सकेन । यस वर्ष सरकारले निर्धारण गरेको समर्थन मूल्यमा नै धान खरिद गरेको कम्पनीले जनाएको छ । 
कम्पनीका अनुसार अहिले १ लाख ६६ हजार ३ सय ४६ क्विन्टल खाद्यान्न मौज्दात रहेको छ । सुगम जिल्लामा ६० हजार ६ सय ५२ क्विन्टल चामल, २४ दुर्गम जिल्लामा २३ हजार क्विन्टल चामल मौज्दात रहेको छ । दुर्गम र सुगम जिल्ला गरेर ८३ हजार ६ सय ९३ क्विन्टल चामल मौज्दात रहेको कम्पनीले जानकारी दिएको छ ।  यसैगरी कम्पनीसँग ७९ हजार ३ सय १५ क्विन्टल धान र ३ हजार ३ सय ३७ क्विन्टल गहुँ मौज्दात रहेको छ ।

कम्पनीले हालसम्म सुगम जिल्लामा ४४ हजार १ सय २० र दुर्गमका  २४ जिल्लामा ५७ हजार क्विन्टल खाद्यान्न वितरण गरेको जानकारी दिएको छ । दुर्गम जिल्लाहरुमा नियमित रुपमा खाद्यान्न ढुवानी गरिरहेको कम्पनीले बताएको छ ।  कम्पनीले लामो समयदेखि विभिन्न खाद्यान्न सस्तो मूल्यमा बिक्री गर्दै आएको छ । उपभोक्तालाई राहत दिनका लागि बजारमा चलिरहेको मूल्यभन्दा सस्तोमा खाद्यान्न बिक्री गर्ने गरेको कम्पनीको दाबी छ ।  

यस वर्ष कम्पनीले बिर्तामोडबाट सोना मन्सुली धान ९ सय ३० टन, रन्जित धान १.९ टन र सोना मन्सुली धान ९ सय ९६ टन खरिद गरेको जानकारी दिएको छ । यसैगरी विराटनगरबाट ९ सय ९६ टन, लहानबाट १८ सय टन, जनकपुरबाट १८ सय टन, वीरगन्जबाट १८ सय टन र भैरहवाबाट १ हजार टन धान खरिद गरेको छ ।