काठमाण्डौंं
लोकतान्त्रिक समाजवादी पार्टी (लोसपा) ले मधेश प्रदेशमा स्थानीय तहको निर्वाचन असोज २०७९ मा गर्न माग गरेको छ ।

सरकारले सोमबार मात्रै स्थानीय तहको निर्वाचन ३० वैशाखमा देशभर एकै चरणमा गर्ने निर्णय गरेको छ । अघिल्लो पटक तीन चरणमा चुनाव भएको भए पनि स्थानीय तह निर्वाचन ऐन २०७३ अनुसार सबै जनप्रतिनिधिको कार्यकाल ५ जेठ २०७९ मा सकिने निर्वाचन आयोगले बताएको छ ।

अघिल्लो निर्वाचन २ असोज २०७४ मा भएकोले निर्वाचित भएका मधेश प्रदेशका जनप्रतिनिधिको अधिकार खुम्चिन पुग्ने लोसपाले दावी गरेको छ । लोसपा मधेश प्रदेशका अध्यक्ष जितेन्द्र सोनल भन्छन्, संविधानले स्थानीय जनप्रतिनिधिको पदापधि ५ वर्ष हुन्छ भनेको छ । मधेश प्रदेशका जनप्रतिनिधिको कार्यकाल पाँच छ महिना नै कटौती गर्ने अधिकार कसैलाई छैन, निर्वाचन आयोगलाई पनि छैन ।

अघिल्लो समय असोजमा निर्वाचन भएकोले निर्वाचित जनप्रतिनिधिहरुको कार्यकाल पुरा हुनुपर्ने उहाँको भनाई छ । हामी आवधिक निर्वाचनको पक्षमा छौं, स्थानीय निर्वाचन घोषणाको पनि स्वागत गरेका छौं, तर कसैको अधिकार कुण्ठित गर्ने कसैको मनसाय हुनुहुन्न । मधेश प्रदेशको निर्वाचन असोजमा गर्ने वातावरण बनाउनु पर्नेमा उहाँको जोड छ ।