तश्विर रासस

दाङ । 
जीवनको अधिकांश समय राजनीतिमा विताएर अहिले कृषि पेशामा लाग्नुभएका लोकेन्द्र विष्ट मगरको नेपाली राजनीतिमा धेरै ठूलो योगदान छ । विद्यार्थी जीवनदेखि नै राजनीतिमा लागेका विष्ट तत्कालीन माओवादी शान्ति प्रक्रियामा आइसकेपछि माओवादी पार्टीमा केन्द्रीय सदस्य हुँदै २ पटक मन्त्रीसमेत हुनुभयो ।

राजनीनिमा लागेर मन्त्रीसम्म भइसकेका उहाँ अहिले ड्रागन फ्रुटको खेती गरिरहनुभएको छ । बिष्टको अहिले दाङको बिजौरीमा ३ बिगाह भन्दा बढी जग्गामा रसिलो र स्वादिलो सिउँडी प्रजातिको ड्रागन फ्रुटको खेती फस्टाईरहेको छ । करिव १ करोड लगानी भएको बिष्टको ड्रागन फ्रुटको बगान छ । ड्रागन फल पोषण तत्व र विभिन्न रोग विरुद्व लड्नका लागि उपयोगी फल हो ।

कुनै सामान्य पदमा पुग्दापनि विभिन्न ढंगबाट लाभ लिने र कामै नगरी राजनीति गर्नेहरुका लागि उहाँ एक उदाहरणिय पात्र हुनुहुन्छ । देशका विभिन्न स्थानमा कृषि फार्म सञ्चालन गरेको अनुभव संगालीसक्नुभएका पूर्व मन्त्री विष्टलाई राजनीति भन्दा कृषि क्षेत्रै प्यारो लाग्न थालेको छ । कुनै समय सक्रिय र भूमिगत राजनीतिमा संलग्न उहाँले राजनीतिलाई गलत प्रवृति भएका मानिसहरुका कारण नराम्रो बनाइएको भन्नुहुन्छ । हरेक क्षेत्रको सुधारका लागि राजनीति अपरिहार्य छ । तर मलाई कृषिमै मन बस्यो, अब यसैलाई अझै राम्रो गर्दै जाने हो ।