बागलुङ
बागलुङ नगरपालिका–८ सिगानाका अनन्तबहादुर खड्काले यो वर्ष आफ्नो बगैँचाबाट सुन्तला टिपेर पोखरा पु¥याउनु भयो । उहाँले यस वर्ष ४ लाख ५० हजारको सुन्तला बेच्नु भएको छ  । सुन्तला टिप्ने ज्याला र यातयात खर्च घटाउँदा उहाँले ४ लाख बचत गर्नुभएको हो  ।
 सिगानामा सबैभन्दा ठूलो सुन्तला बगैँचा अनन्त खड्काको छ । उहाँको बगैँचामा २०० वटा सुन्तलाका बोटहरु छन । उहाँले सुन्तलाको बढी मूल्य लिन पोखरा लगेर बिक्री गरेको बताउनुभयो । सुन्तला बोटबाटै बिक्री गर्दा प्रतिकिलो  ६० देखि  ६५ सम्म पर्छ, पोखरा लगेपछि  १२० सम्ममा बिक्री गरेको छु, खड्काले भन्नुभयो, “यसपटक गत वर्षभन्दा एक लाख बढी आम्दानी गर्ने योजना सफल भयो, टिप्ने बेलामा केही औसा किराले झारेका कारण केही समस्या भयो ।” खड्काले बगैँचा सुधार र मलजलमा ध्यान दिने हो भने सुन्तला उत्पादनमा वृद्धि हुने अनुभव सुनाउनुभयो ।

यस्तै सिगानाकै अर्का किसान रामबहादुर खड्काले यस वर्ष बोटबाटै  २ लाखको सुन्तला बिक्री गर्नुभएको छ । उहाँले गत वर्षको तुलनामा औसा किराको प्रभावले केही कम उत्पादन भएको जानकारी दिनुभयो । गत वर्ष  साढे दुई लाख हात परेको थियो, नयाँ उत्पादन दिने बिरुवासहित यस वर्ष तीन लाख हात पार्ने लक्ष्य हो, तर औसा किरा र वर्षातको समयमा फूल झर्दा २ लाखको मात्रै सुन्तला उत्पादन भएको छ”, खड्काले भन्नुभयो ।

 सिगाना प्रधानमन्त्री कृषि आधुनिकीकरण परियोजनाअन्तर्गत सुन्तला पकेट क्षेत्रका रूपमा समेत समावेश भएको छ । सिगानामा कोरोनाअघि वार्षिकरूपमा सुन्तलाको प्रवद्र्धन र विकासका लागि सुन्तला उत्सवसमेत आयोजना हुँदै आएको थियो । कोरोनाका कारण दुई वर्षदेखि सुन्तला उत्सव हुनसकेको छैन ।

खड्काजस्ता सिगानमा १०० भन्दा बढी किसानले व्यावसायिकरूपमा सुन्तला खेती गर्दै आएका छन् । उनीहरुले यस वर्ष झण्डै  साढे दुई करोडको सुन्तला बागलुङ बजार, पोखरा र चितवनको बजारमा बिक्री गरेका छन् । सुन्तलाको पकेट क्षेत्रका रूपमा रहेको सिगानामा प्रतिवर्ष सुन्तला उत्पादनमा क्रमशः वृद्धि हुँदै आएको बागलुङ नगरपालिका–८ का वडाध्यक्ष राजन जिसीले जानकारी दिनुभयो ।

सिगानामा पछिल्लो ५ वर्षमा झण्डै ३० हजार सुन्तलाका बिरुवा थप भएका छन । वडाध्यक्ष जिसीले भन्नुभयो, बागलुङ नगरपालिकाले उब्जानी अनुदानवापत यो आर्थिक वर्षमा सिगानाका किसनाले ६ लाख अनुदानसमेत पाएका छन्, नयाँ बिरुवाले उत्पादन दिन थालेपछि सिगानामा वार्षिक ५ करोडको सुन्तला निर्यात गर्ने हाम्रो लक्ष्य हो, यस वर्ष साढे दुई करोड रकम सुन्तला बिक्री गरेर किसानले भित्र्याएका छन् । खेतीपाती मासेर सुन्तला लगाउँदा किसानले सुन्तला फलाउन कम्तीमा ५ वर्ष लाग्ने भएकाले नगरपालिकाले सुन्तलाको रोपनीका आधारमा उब्जनी अनुदान दिँदै आएको छ ।

यस वर्ष ३ करोडको सुन्तला बिक्री गर्ने किसानको लक्ष्य रहे पनि अत्यधिक वर्षा र औसा किराको समस्याले ५० लाखको उत्पादन घटेको छ । सिगानाका सयभन्दा बढी किसनाको बगैँचामा बढीमा २०० देखि घटीमा १० बोटसम्म उत्पादन दिने सुन्तलाका बोट छन् । उनीहरुले सुन्तला खेतीतर्फ आकर्षण बढेपछि खेत तथा कोदो बारी मासेर धमाधम सुन्तला खेती विस्तार गदैआएको छन् ।
यो वर्ष बागलुङ नगरपालिकाले २ हजार सुन्तलाका बिरुवा र २ हजार कागतीका बिरुवा अनुदानमा वितरणसमेत गरेको थियो । सिगाना प्रधानमन्त्री कृषि आधुनिकीकरण परियोजनाअन्तर्गत सुन्तला पकेट क्षेत्रका रूपमा समेत समावेश भएको छ । सिगानामा कोरोनाअघि वार्षिकरूपमा सुन्तलाको प्रवद्र्धन र विकासका लागि सुन्तला उत्सवसमेत आयोजना हुँदै आएको थियो । कोरोनाका कारण दुई वर्षदेखि सुन्तला उत्सव हुनसकेको छैन । सिगानाका सुन्तला स्वादिष्ट हुने भएकाले यसको माग उच्च रहेको छ । रासस