काठमाडौँ, ११ माघ । गृहमन्त्री बालकृष्ण खाँणले नेपालको विमानस्थल प्रयोग भएर कुनै पनि मुलुक र मित्रराष्ट्रलाई असर पर्ने कुनै पनि काम हुन नहुने बताउनु भयो । 

त्रिभुवन अन्तर्राष्ट्रिय विमानस्थल सुव्यवस्थित बनाउन सके मुलुकको प्रतिष्ठा बढ्ने

नेपालको विमानस्थल प्रयोग गर्दा कुनै पनि मुलुक र मित्रराष्ट्रलाई असर पर्ने काम भए ठूलो मूल्य चुकाउनु पर्ने उहाँको भनाइ थियो । मंगलबार राजधानीमा भएको एक छलफलमा उहाँले त्रिभुवन अन्तर्राष्ट्रिय विमानस्थल सुव्यवस्थित बनाउन सके मुलुकको प्रतिष्ठा बढ्ने पनि उहाँले राय व्यक्त गर्नुभएको थियो ।

गृहमन्त्री बालकृष्ण खाँणको अध्यक्षतामा त्रिभुवन अन्तर्राष्ट्रिय विमानस्थलमा विभिन्न निकायको समन्वयात्मक परिचालन र व्यवस्थापनबारे सरोकारवाला निकायबीच छलफलमा भएको थियो ।

मुलुकलाई सुरक्षित मुलुकका रूपमा परिचित बनाउन एयरपोर्टलाई व्यवस्थित बनाउनु पर्ने उहाँको भनाइ थियो । मुलुकको एउटा मात्र अन्तर्राष्ट्रिय एरपोर्टलाई प्रविधियुक्त बनाउन सरकार लागिरहेको उहाँले बताउनु भयो ।

छलफलमा श्रम रोजगार तथा सामाजिक सुरक्षामन्त्री कृष्णकुमार श्रेष्ठ, परराष्ट्रसचिव भरतराज पौड्याल, सस्कृति पर्यटन तथा नागरिक उड्डयन मन्त्रालयका सचिव महेश्वर न्यौपाने, गृहसचिव टेकनारायण पाण्डेसहितको सहभागिता थियो ।